Putinin gələn il gedəcəyini deyib “varis planı”nı açıqladı...və “yoxa çıxdı”

 
“Moskovskiy komsomolets” qəzetinin saytından Moskva Dövlət Beynəlxalq Əlaqələr İnstitutunun professoru, politoloq Valeri Soloveylə müsahibə yoxa çıxıb.
 
Virtualaz.org   xəbər verir ki, o, müsahibədə Rusiyada növbədənkənar prezident seçkilərinin keçiriləcəyindən, ölkə başçısı Vladimir Putinin “bəzi problemləri”ndən, buna görə də hakimiyyəti başqasına – varisinə ötürəcəyindən danışıbmış. Bu müsahibə dərc olunandan sonra Kreml növbədənkənar prezident seçkiləri ehtimalını rədd edib, belə plan olmadığını bildirib.
 
Lakin politoloqun müsahibəsi saytdan yığışdırılandan sonar onun özü də “yoxa çıxıb”. O müsahibənin yoxa çıxması haqqında nəinki “Currenttime.tv”nin suallarını cavablandırmaqdan imtina edib, hətta təcili və bir neçəgünlüyə Moskvadan gedib.
 
Vladimir Soloveyin Kremlin mətbəxi barədə yetərincə məlumatlı adam reputasiyası var. Bir misal: O, Prezident Administrasiyasının indiki rəhbəri Anton Vaynonun bu vəzifəyə gətiriləcəyini əvvəlcədən söyləmişdi.
 
 
 
Solovey “Moskovskiy komsomolets” qəzetinə müsahibəsində deyib ki, Rusiya prezidenti gələn ilin yazında hakimiyyəti tərk edə və bu vəzifəni varisinə buraxa bilər. Politoloqun sözlərinə görə, Vladimir Putinin növbədənkənar seçkilərə gedib-getməyəcəyi bu ilin dekabrında bilinəcək. O, indiki dövlət başçısının “hansısa problemləri” olduğunu, bu üzdən gələn il ictimaiyyət arasında aylarca görünməyəcəyini və ya nadir hallarda üzə çıxacağını iddia edir.
 
Politoloq təcili seçkilərin keçirilməsini iki il sonra ölkədə durumun daha da pisləşəcəyi ilə də əsaslandırır. Soloveyin dediyinə görə, güc strukturlarındakı kadr ehtiyatı, onların “barış siyasəti” aparmaq qabiliyyətinin olmaması Putini məyus edib. Politoloqun daha bir iddiası da var: Rusiya prezidenti onun hakimiyyəti dönəmində ölkəsinin Qərblə münasibətlərinin yaxşılaşmayacağına artıq əmindir.
 
Solovey Vladimir Putinin varisinin indiki baş nazir Dmitriy Medvedev olacağını və onun bu rola hazırlaşdırıldığını söyləyir, amma güc qurumlarının “varis”in əleyhinə olduğunu bildirməyi də unutmur.Varisliyə ikinci namizəd xüsusi xidmət orqanlarının 2008-ci ildə irəli çıxardığı, bir qədər öncə Prezident Administrasiyası rəhbərliyindən uzaqlaşdırılan Sergey İvanov ola bilər.
 
Vladimir Soloveylə müsahibə elə yayıldığı günün birinci yarısındaca yoxa çıxıb. “Moskovskiy komsomolets”in baş redaktoru və təsisçisi Pavel Gusev “Cirrenttime TV”yə deyib ki, sözügedən müsahibənin mətnində “faktik yanlışlar” olub və onların aradan qaldırılması bir neçə gün vaxt aparacaq:
 
 
 
“Lütfən, unutmayın ki, “Moskovskiy komsomolets” özəl şəxsə məxsus tək federal qəzetdir və bu şəxs – Pavel Nikolayevich Gusev-dir. Bu qəzetlə bağlı hər şey - 100 faiz hər şey ona aiddir: nəşriyyat evi, bölgələrdəki, xaricdəki və hər yerdəki qəzetlər. O səbəbdən məni telefonla tapmaq çox çətindir”.
 
Politoloq Yekaterina Şulman həmkarı Valeriy Soloveyin söylədiklərini doğru sayır. O, professorun bundan əvvəl “Gazeta.ru”ya da eyni məzmunlu müsahibə verdiyini yada salır. Moskva Dövlət Beynəlxalq Münasibətlər İnstitutu professorunun YouTube-da şəxsi kanalı da var. Çıxışlarını orda da yayır, üstəlik, facebook-da da yetərincə populyardır. Ancaq Şulmanın sözlərinə görə, çap mediası – qəzet bir başqadır, çünki onu daha çox metroda oxuyurlar.
 
Yekaterina Şulman deyir ki, Solovey artıq bir neçə dəfə Putinin“bəzi obyektiv səbəblərdən” 2018-ci ildəki seçkilərə qatılmayacağı haqda proqnozlar səsləndirib. Onun qənaətincə, buna Rusiya prezidentinin səhhəti səbəb ola bilər.
 
Şulmanın fikrincə, dövlət başçısının kadr yerdəyişmələrini bir neçə dəfə öncədən dəqiqliklə söyləyən professorun, çox güman, hakimiyyətdə öz qaynağı var. Həmin qaynaq da bəlli məqsəd güdə, verilən məlumatın ictimailəşməsini gözləyə bilər. Politoloq düşünür ki, hakimiyyətin və ya hakimiyyətdəki bir qrupun ictimai rəyə nələrisə ötürmək istəməsi mümkündür.