Nazirlərin üçtərəfli danışıqları jurnalistlərin davası və zarafatla başladı - FOTOLAR

Azərbaycan, Rusiya və İran xarici işlər nazirləri arasınd Bakıda başlayan üçtərəfli danışıqlardan əvvəl jurnalistlərlə insident yaşanıb.
Turaninfo.az Virtualaz.org-a istinadən xəbər verir ki, nazirlər danışıqlar masasının arxasına keçəndə 70-yə yaxın jurnalist onları əhatəyə alıb və suallar yağdırmağa çalışıb.
Bu zaman mühafizəçilərlə jurnalistlər arasında çəkişmə yaşanıb, habelə jurnalistlər öz aralarında az qala dava salacaqdılar.
Mühafizəçilər jurnalistləri birtəhər zaldan çıxarıblar. Nazirlər isə fotoreportyorların onları lentə aldıqları dəqiqələrdə bir-birləri ilə zarafatlaşıblar.
“Mən artıq bu üçtərəfli görüşlərə alışmağa başlayıram”-İran xarici işlər naziri Məhəmməd Cavad Zərif bu gün səhər nazirlərin üçtərəfli formatda işgzar səhər yeməyinə eyhamla bildirib.
Azərbaycan xarici işlər naziri Elmar Məmmədyarov isə jurnalistləri sakitləşdirməyə çalışıb: “Danışıqların yekunu olaraq bizim əhatəli bəyanatımız olacaq, ona görə də mətbuat konfransını gözləyin”.
Rusiya xarici işlər naziri Sergey Lavrov isə onu çəkən jurnalistlərə eyhamla deyib : “Nə vaxt əlimi burnuma aparsam onda çəkirlər”

Nazirlərin kefi yerində olub və öz aralarında zarafatlaşıblar. Xatırladaq ki, üçtərəfli görüş əvvəlcədən planlaşdırılmışdı, Azərbaycan, İran və Rusiya arasında üçtərəfli əməkdaşlıq, Şimal-Cənub nəqliyyat dəhlizi və digər mövzular müzakirə olunmalıydı.
Lakin Qarabağda başlayan döyüşlər Bakı görüşündə bu münaqişənin də mərkəzi mövzuya çevrilməsinə səbəb oldu.