Natavan Həbibi: “Aygün öz yalanını açdı”

Müğənni Natavan Həbibi “Ana vətənim” mahnısına çəkdirdiyi klipi təqdim etməyə hazırlaşır.
Musavat.com saytına açıqlama verən müğənni deyib ki, çəkilişləri Atəşgahda baş tutan ekran işi tezliklə tamaşaçıların ixtiyarına veriləcək: “Musiqisi Eldar Mansurova, sözləri İsmayıl Dadaşova məxsus “Ana vətənim” mahnısına klip çəkdirmişəm. Çəkilişlər Atəşgahda baş tutub. Ekran işi üçün xüsusi geyim hazırlatmışdım. Mahnıya rejissor Nail Naiboğlu ekran həyatı verib. Yeni işimi tezliklə sevənlərimə təqdim edəcəyəm”.
N.Həbibi müğənni Aygün Kazımova ilə aralarında yaşanan qalmaqaldan da danışıb. Sənətçi, Aygün Kazımovanın ölkədən çıxışına qoyulan qadağanı saxta sənədlə ləğv etdirməsinə münasibət bildirib: “Aygün məsələsindən danışmaq istəmirəm. Lazım olan bütün işləri vəkilim həll edir. İşlərimizi qanunla görürük, sənədlərimiz yerindədir. O, məhkəməyə ağır xəstə olduğu barədə sənədlər təqdim etdiyi üçün ölkədən çıxışına qoyulan qadağa müvəqqəti ləğv edilmişdi. Aygünün yalanını açmaq üçün vəkilim mətbuata açıqlama verdi ki, o, ağır xəstədir. O, özü öz yalanını açdı, xəstə olmadığını dedi. Həqiqət üzə çıxdı və istədiyimiz nəticəni əldə etdik. Bundan sonra yaşanan proseslər barədə vəkilim açıqlama verəcək”.
Qeyd edək ki, A.Kazımova Natavan Həbibiyə erməni dediyi üçün sənətçi onu məhkəməyə verib. Məhkəmənin verdiyi qətnaməyə görə, Aygün Kazımova Natavan Həbibidən üzr istəməli və yaydığı məlumatları təkzib etməlidir. Lakin müğənni qətnaməni icra etməkdən boyun qaçırıb.
Aygün Kazımova məhkəmə qətnaməsini icra etmədiyi üçün onun ölkədən çıxışına qadağa qoyulub. Daha sonra isə A.Kazımova məhkəməyə ağır xəstə olduğu barədə sənəd təqdim etdiyi üçün ölkədən çıxışına qoyulan qadağa müvəqqəti ləğv edilib.

Загрузка...
Загрузка...