Müştəri həmişə haqlıdır”: Amma Azərbaycanda yox

Baxış sayı: 
150

 
    
 
Paytaxtın Binəqədi rayonu ərazisində yerləşən "Köhnə Bakı" kafesində ofisiant Mirzağa Məmmədov aralarında yaranmış mübahisə zəminində müştəri, 1999-cu il təvəllüdlü Çingiz Ramiz oğlu Qədirlini bıçaqlayaraq qətlə yetirib. Ofisiant tərəfindən törədilmiş qətl hadisəsi xidmət sektorunda ciddi problemlərin mövcudluğunu gündəmə gətirib.Xidmət sektorunda çalışanların kobud rəftarı müştəriləri bezdirib.Bu sahədə bərbad vəziyyət təhsillə yox, ümumi mədəniyyət və tərbiyə ilə bağlıdır.
 
Dünyanın əksər ölkələrində müştərilərlə davranış qaydaları barədə dövlət və qeyri-hökumət təşkilatları tərəfindən hazırlıq kursları, seminarlar təşkil edilir, treninqlər keçirilir.Türkiyədə hətta bələdiyyələr bazar satıcılarını pulsuz seminarlara cəlb edərək onlara müştəri ilə necə davranmağı, daha çox müştəri cəlb edib çox pul qazanmağın yollarını öyrədirlər.Ölkəmizdə xidmət sektorunda çalışanlar bundan xəbərsizdirlər.Bu gün bir çox xidmət sektorlarinda çalışmaq üçün işə götürülən işçilərin nəinki davranışına, çalışacağı sahədəki təcrübəsi və ya peşəkarlığına o qədər diqqət yetirilmir.
 
Rusiya, Türkiyə və digər ölkələrdə təkcə restoran, kafe və hotellərdə müştərilərə xidmət etmək üçün götürülən işçilər xüsusi şərtlərlə işə qəbul edilir.Hətta bu sahədə təcrübəsi olmayanlara müəyyən müddətə kurs və ya təlimlər keçirilir.Məsələn, ofisiant işini bilməklə yanaşı, həm də xidmət göstərdiyi hər bir müştəri ilə xüsusi davranış bacarığına malik olmalıdır.Eləcə də market satıcısı, taksi sürücüsü və digər xidmət sahəsində çalışanlar ilk növbədə müştərilərlə davranış qaydalarını düzgün qurmalıdır.Hansısa ölkəyə səfər edərkən o ölkənin füsunkarlığı ilə yanaşı, insanların gülərüzlülüyü, mehribanlığı da insanları cəlb edir.Buradakı ofisiantların, satıcıların, mühafizəçilərin bir sözlə, xidmət sektorunda çalışan hər kəsin mehribanlığı, nəzakəti insanda xoş təəssürat yaradır.Hətta orada taksi sürücülərinin turistlərə xüsusi davranış və nəzakətlə xidmət göstərdiyi göz qabağındadır.Sürücü müştərini gülərüzlə qarşılayaraq əvvəlcə əşyalarını, yükünü əlindən alır, sonra isə xüsusi nəzakət qaydaları ilə taksiyə əyləşdirir.
 
Azərbaycanda bu məsələ bir qədər dar çərçivədədir.Xidmət sektorunda çalışanlarla müştərilər arasında münasibətin özündə bir problem var. Bəzən müştərlərin də qarşı tərəfə kobud, etikadankənar hərəkətləri olur.Müştəri ofisianta sanki müəyyən vaxta qədər seçilmiş köləsi kimi baxır, ofisiantdan onun nazını çəkməyi tələb edir.Nəticədə tərəflər arasında anlaşılmazlıq, xoşagəlməz olaylar yaşanır.Məsələn, ərzaq mağazasına daxil olan müştəri satıcıdan qidanın yerini və qiymətini soruşduqda elə cavab alır ki, o mağazaya girdiyinə peşman olur.Bəzən restoran, kafe və şirniyyat mağazalarında çalışanların əlcəksiz, çirkli əllərlə müştərilərə qulluq etdiyinin şahidi oluruq.Buna etiraz etdikdə isə qarşı tərəfdən sərt təpki ilə qarşılanırıq.Xidmət sektorunda çalışanların insanlarla gülərüz, mehriban rəftar etməsi üçün diplomun, təhsilin bir faydası yoxdur.
 
Ekspertlər hesab edir ki, nə qədər ki, Azərbaycanın xidmət sektorunda çalışanlar üçün xüsusi treninqlər təşkil olunmayacaq və xidmət sektorunun işçiləri bu təlimlərə cəlb edilməyəcək, o qədər bu sahədə bərbad durum davam edəcək.Onu da əlavə edək ki, xidmət sektorunda çalışanların vətəndaşlarla kobud rəftar etməsində onların aldıqları məvacibin azlığı da təsir edir.Bəzən xidmət sektorlarında gündəlik pula işləyən məktəblilərə də rast gəlmək olur.Xidmət sektorundakı bərbad vəziyyət turizmin inkişafına da təsir edir.Turist Azərbaycana gəlib infrastruktur baxımdan hər şeyin yüksək səviyyədə olduğunu görür.Amma xidmət sahəsindəki nöqsanı görəndə, növbəti dəfə gəlmək istəmir.İlk növbədə bizim mentalitetimiz mədəni baxımdan dəyişməli və o sahələrdə bu tələblərə cavab verən işçilər çalışmalıdır.
 
Alçina Amilqızı
 
Cebhe.info

Загрузка...
Загрузка...