BDYP-də MİLLİ FUTBOLÇUDAN RÜŞVƏT TƏLƏB EDİBLƏR! – Ramil Usubova müraciət (YENİLƏNDİ)

 
Azərbaycan milli komandasının və bir çox klublarımızın şərəfini qorumuş tanınmış futbolçu Rəşad Sadiqov Dövlət Yol Polisi (DYP) inspektorlarının əsassız ittihamları ilə üzləşib – onun avtomobili əlindən alınıb və qanunsuz tələblərlə üzləşib. Bu barədə “AzPolitika.info”ya R.Sadiqov özü məlumat verib. Futbolçu bildirib ki, DYP əməkdaşları tərəfindən qanunsuz olaraq avtomobili cərimə meydançasına aparılıb, üstəgəl ondan pul tələb olunub.
 
Saytımıza müraciət edən R.Sadiqov bildirib: “Türkiyə səfirliyinin yaxınlığından keçirdim. 99-YP-445 dövlət nömrə nişanlı avtomobildə xidmət aparan yol polisi əməkdaşları mənə saxla əmri verdi və mən maşını sağa çəkərək əmrə tabe oldum. Mənə yaxınlaşan DYP əməkdaşının ilk sualı “maşında siqnal var?” oldu.  “Yoxdu” cavabını aldıqdan sonra, maşını yoxlamağa başladı, yenidən mənə sual verdi ki, maşına əlavə avadanlıq quraşdırılıbmı. Mən yenidən yox cavabını verdim. Bundan sonra həmin yol polisi göstərişin “yuxarıdan” gəldiyini, onlarlıq bir şeyin olmadığını və maşını dayanacağa aparacağını bildirdi. Mən də qarşılığında onlara avtomobilin mənim əmlakım olduğunu xatırladıb, “yuxarı” deyəndə kimi nəzərdə tutduğunu soruşdum. Əgər maşın içəri getməlidirsə bunun bir açıqlaması, səbəbi olub-olmadığını, mülkümü əlimdən alıb məni piyada yola salmağın qanunsuz olduğunu, “siqnal dediniz yoxdu, əlavə avadanlıq dediniz yoxdu, bəs mənim maşınımı niyə aparırsız dayanacağa?”, deyə etiraz etdim. Həmin yol polisi əməkdaşı bir daha mənə göstərişin “yuxarıdan” olduğunu bildirdi. Avtomobilimi, öz şəxsi əmlakımı həmin yol polislərinə verib, taksi ilə evə getdim”.
 
 
R.Sadiqov bildirir ki, səhəri gün Bakı şəhər Dövlət Yol Polisi İdarəsinə gedib. “Bizim işə 18-ci otaqda baxılacağını bildirdilər. Daxil olduq deyilən otağa, bizi polis mayoru Qafarov Cavad qarşıladı. Yuxarıda qeyd etdiyim sualların hamısını həmin polis mayoruna ünvanladım və yenidən maşınıma niyə əl qoyulduğunu soruşdum. C.Qafarov sənədləri yoxladıqdan sonra, mənə maşının saxlanılması üçün heç bir səbəbin olmadığını bildirdi. Çünki ödənilməmiş cəriməm yox idi. Və mən yenidən sual etdim ki, səbəbini kimsə açılayacaqmı ki, mənim maşınım niyə dayanacağa aparılıb. Bundan sonra C.Qafarov inspektorlara göstəriş verdi ki, “gedin maşının “qluşitel”ini yoxlayın”. Getdik dayanacağa, maşın yoxlanıldı və səsin normadan biraz artıq olduğu bildirildi. Bunlara bildirdim ki, maşını zavod bu şəkildə istehsal edib, yenicə qeydiyyatdan keçirmişəm, əgər belə idisə niyə qeydiyyatdan keçiriblər”. Ünvanladığım bu sualların heç birinə cavab verilmədi”.
 
 
Bundan sonra R.Sadiqov yenidən Bakı şəhər Dövlət Yol Polisi İdarəsinə qayıdıb. Mayor Cavad Qafarov “obed”ə getdiyini bildirib, qayıtdıqdan sonra bu işlə məşğul olacağını deyib. “Bir neçə saat gözlədikdən sonra yenidən otağa daxil olduq. Mayor bizi qəbul etmədi, köməkçisi isə bizə maşının cəriməsinin 500 manat olduğunu bildirdi: “Maşının səsi artıq olduğuna görə cəriməsi 500 manatdır. 500 manat verin, kağız yazım verim, gedin maşını çıxarın”. Bunun qanunsuz olduğunu, əgər həqiqətən 500 manatlıq cəriməsi varsa bunu qanuni yolla alınmasını, yəni protokol tərtib edilməsini istədim. Əgər protokol tərtib edilməsə, məhkəməyə baş vuracağımı bildirdim. Həmin serjant “gedin verin məhkəməyə” dedi. Nə protokol tərtib edən oldu, nə də bizim şikayətimizə baxan. DİN-in 102 qaynar xəttinə 2 dəfə zəng vurmuşam, heç bir xəbər yoxdu”.
 
 
“AzPolitika.info” vasitəsilə səsini Daxili İşlər naziri Ramil Usubova çatdırmaq istəyən milli futbolçumuz, qanunun aliliyinə inandığını və bu işə aydınlıq gətirilməsini xahiş edir.
 
Futbolçu Rəşad Sadiqovun DYP ilə bağlı şikayətinə Bakı şəhəri Dövlət Yol Polisi İdarəsinin ictimaiyyətlə əlaqələr şöbəsinin rəisi Vaqif Əsədov münasibət bildirib. O, “AzPolitika.info” ilə əlaqə saxlayaraq, R.Sadiqovun haqsız olduğunu deyib: “Çox təəssüf olsun ki, Azərbaycan milli komandasının və bir çox klublarımızın şərəfini qorumuş tanınmış futbolçu Rəşad Sadiqov sizin sayt vasitəsilə DYP-nin fəaliyyəti ilə bağlı əsassız ittihamlarla çıxış etmişdir. Bu gün o, yol hərəkətində öz hərəkəti ilə başqalarına nümunə göstərmək əvəzinə ona təyin edilmiş cərimə məbləğinin yüksək olmasını görüb KİV vasitəsilə ictimailəşdirmək məqsədi güdüb və cərimədən yayınmaq üçün belə vasitəyə əl atıb. Məşhur futbolçu 15 avqust tarixində yol hərəkəti haqqında qanunun tələblərini pozduğu üçün ərazidə xidmət aparan yol polisi inspektoru tərəfindən saxlanılmış və idarə edilən “Maseratti” markalı 10-SS-606 dövlət nömrə nişanlı avtomobilin mühərrikinin səs gücünün normadan artıq olması ilə əlaqədar informasiya verilib. Eyni zamanda futbolçunun iştirakı ilə avtomobilin işlək vəziyyətdə mühərrikin səs gücünün artırılması xüsusi cihaz vasitəsilə yoxlanılıb və normativ tələblərin həqiqətən pozulması aşkar edilib. Sürücünün iştirakı ilə “KYP-647967” saylı inzibati protokol tərtib edilib. Futbolçu aidiyyatı üzrə nəqliyyat vasitəsinə buraxılış vərəqəsi almaq üçün qeyd etdiyi 18 saylı otaqda polis mayoru Qafarov Cavadla həqiqətən qarşılaşıb və bununla əlaqədar verdiyi sorğuya əsasən cərimə məbləğinin 500 manat olması ona bildirilib. Çox güman ki, o, cərimə məbləğinin yüksək olmasına görə belə bir vasitəyə əl atıb. ”
 
“AzPolitika”
 

Загрузка...
Загрузка...