ABŞ-dakı azərbaycanlılar Obamaya müraciət göndərdi

Nyu York Azərbaycan Assosiasiyası son günlər Ermənistanın həyata keçirdiyi hərbi təxribatlarla bağlı ABŞ prezidenti Barak Obamaya məktub ünvanlayıb.
Diasporla İş üzrə Dövlət Komitəsindən virtualaz.org-a verilən məlumata görə, məktubda ABŞ prezidentinə Ermənistan və Azərbaycan qoşunlarının təmas xəttində Ermənistan ordusu tərəfindən atəşkəsin pozulması nəticəsində dinc sakinlərin həlak olması barədə məlumat verilib: "Cənubi Qafqaz regionundakı dövlətlər sülh şəraitində yaşadığı halda Ermənistanın bu ərazidə yaratdığı münaqişə bütün region dövlətləri üçün böyük təhdid yaradır. Ermənistanın işğalçılıq siyasəti Azərbaycan ərazisinin 20 faizinin işğal altında qalmasına və bir milyondan çox azərbaycanlının öz torpaqlarından didərgin düşməsinə səbəb olub".
Həmçinin bildirilib ki, BMT tərəfindən qəbul edilmiş dörd qətnamədə Azərbaycanın ərazi bütövlüyü, suverenliyi və sərhədlərinin toxunulmazlığı tələb edilsə də, işğalçı ölkə silahlı qüvvələrini zəbt olunmuş Azərbaycan ərazilərindən çıxarmır: "Beynəlxalq təşkilatlar tərəfində qəbul edilmiş qətnamələrə baxmayaraq, Ermənistan hələ də öz öhdəliklərini yerinə yetirmir. ABŞ-da yaşayan azərbaycanlılar adından Ermənistan dövlətinin Azərbaycanın işğal olunmuş ərazilərinə təcavüzünü və apardığı hərbi əməliyyatları qətiyyətlə pisləyirik".
Məktubda Birləşmiş Ştatların prezidentinə bildirilib ki, Azərbaycan ABŞ-ın strateji tərəfdaşıdır və ABŞ azərbaycanlıları inanır ki, ABŞ Ermənistan dövlətinin təcavüzkar siyasətini davam etdirməsinə laqeyd qalmayacaq.